واحد أعرفه أخته إتطلقت، فجدد شقة أبوه وأمه من سباكة لسراميك لنقاشة واشترى عفش جديد
واحد أعرفه أخته إتطلقت، فجدد شقة أبوه وأمه من سباكة لسراميك لنقاشة واشترى عفش جديد، وقالها إسكني إنتي وأولادك يا حبيبتي، وأقسم على نفسه يتكفَّل بمصاريفها ومصاريف أولادها أفضل مما كان بيعمل معاهم أبوهم!
وبسم اللّٰه ما شاء اللّٰه عليه فضل أكتر من خمس سنين حديث الناس كلها في الرجوله والجدعنه والأخلاق والأصول لدرجة إني في مرة شديت مع أختي فقارنتني بيه، ومرة مراتي شدت مع أخوها فقارنته بيه برضوا!
كنت بغير منه واللّٰهِ.. اللي هو حرام عليك يا جدع، تشتغل شغلانتين عشان تصرف على عيال مش عيالك في حين إن أبوهم عايش ويمكن معاه أكتر منك!!
فإبتسمت ما بيني وما بين نفسي بشماته كده وقلت أيوا بقى، ما هو إنت أكيد فيك عيب زي كل الرجاله يعني!
وغصبٍ عني واللّٰه شغلت دماغي بحوار طلاقه ده أوي، وكنت ھموت وأعرف ليه؟!
وفي مرة إتلاقيت مع زميل ليا عارف أخبار الساقطة والوالدة والجديد من الكلام على الناس كله معاه، فسألته ألَّا متعرفش أخوك عبوده عاوز يطلق مراته ليه؟!
ضحك وقالي عشان راجل.
المعلمة بتقوله كفاية عليك أختك، وأولادها أبوهم أولى بيهم!
فقالها الخال والد لو الوالد معندوش مبدأ، فأنا أبوهم وهي أختي، وصية أبويا وأمي الوحيدة قبل ما يموتوا، فمش كفاية عليا هي وأولادها وأي حد تحبه كمان..
فزعقت معاه وكلمة من هنا على كلمة من هنا، قالها لو بتحُطي حاجة من جيب أبوكي في البيت إمنعيها ولو مقصر معاكي في حاجة قوليها،
غير كده حاولي تبقي داعمة مش مُحطمة لإني متجوزك عشان تعينيني على فعل الخير مش تمنعيني عنه!
فقالتله أيوا أنا الشيطانية وإذا كان عجبك، وإنت عارف بقى الستات لما بتبقى متعصبة بتقول إيه!
فقالها على بيت أبوكي لحد ما ترجعي عن اللي في عقلك، وإذا مرجعتيش إعتبري نفسك طالق من دلوقتي، وكان ناوي يطلقها فعلاً واللّٰهِ، لكن أبوها راجل إبن أصول برضوا..
سابهُم لحد ما هديوا من ناحية بعض خالص، ورن عليه قاله تعالى عشان عاوزك، وبمجرد ما جه.. قعَّدوا معاها، فحنوا لبعض ولا كأن حاجة حصلت، ورجعت البيت أول إمبارح!
قالي أكيد معرفش يعني، لكن أنا سمعت إنُّه بيعمل مع أخته كل ده عشان ميديش فرصة للشيطان إنُّه يزعزع فكرة حفاظها على نفسها، عاوزها تفضل قوية ومتضعفش أبدًا لكلام أي راجل عشان متحطش وشه الأرض في يوم من الأيام لإنُّه مقدرش يعوضها عن اللي كانت متجوزاه، وعشان كده ديمًا بقول عليه وبالفُم المليان راجل.
